Нафийы номыл преми
Зындгонд фыссæг æмæ ахуыргонд, æхсæнадон архайæг Джусойты Нафийы номыл Хуссар Ирыстоны 2015 азы фæзынд преми. Нафийыл уыцы аз сæххæст 90 азы.
Преми саразæг у Хуыгаты Ростислав - Самарæйы цæрæг, ацы облæсты ирон диаспорæ "Алания"-йы национ-культурон центры сæрдар, Самарæйы кадджын æмбæстаг. Уый Хуссар Ирыстоны сарæзта хæрзаудæн фонд "Амонд", йæ директор та у историк Челæхсаты Хъазыбег.
Фонды архайджыты фæнд у, иронау чи фыссы, стæй литературæмæ чи бакъахдзæф кодта, уыдоны уацмысты хуыздæртæн æртæ премийы раттын Нафийы номыл, уыимæ ма сæрмагонд дипломтæ æмæ майдантæ фыссæджы хуызистимæ.
Нафийы номыл премитæ ацы аз радтой цыппæрæм хатт. Мадзал арæзт æрцыд Хуссар Ирыстоны паддзахадон университеты æмбырдтæаразæн залы. Раныхас дзы кодта Хуссар Ирыстоны Президент Бибылты Анатоли. Уый арфæ ракодта преми саразджытæн æмæ конкурсы архайджытæн.
Уый фæстæ Президент Нафийы номыл 2019 азы фыццаг премийæ схорзæхджын кодта поэт, тæлмацгæнæг æмæ журналист Дыгъуызты Тенгизы. Дыккаг преми Хуыгаты Ростислав радта Хуссар Ирыстоны фысджыты цæдисы уæнг, паддзахадон университеты ахуыргæнæг Годжыцаты Неляйæн. Æртыккаг преми та райста поэтессæ, Цæгат Ирыстоны Культурæйы министрады кусæг Баситы Зæлинæ.
Хæрзаудæн фонд "Амонд" ма расидт конкурс хъуыстгонд поэт æмæ драматург, тæлмацгæнæг Плиты Грисы номыл. Радта йæ хуыздæр студенттæн. Конкурсы уæлахиздзаутæ систы Сиукъаты Виктория æмæ Уанеты Виктория. Радтой сын æхцайы премитæ æмæ дипломтæ Грисы хуызистимæ.
Конкурсты архайджытæн, премитæ бацæттæгæнджытæн арфæ ракодта Цæгат Ирыстоны паддзахадон университеты доцент, филологон зонæдты кандидат, Нафийы хо Джусойты Клавдия.
Челæхсаты Хъазыбег куыд загъта, афтæмæй ацы премитæ абонмæ æрвылаз лæвæрдтой, нырæй фæстæмæ та - æртæ аз иу хатт.
ГАССИТЫ Моисей.