Æппæтуæрæсеон конкурс "Хуыздæр муниципалон практикæ"-йы номинацитæй иу у "Муниципалон экономикон политикæ æмæ муниципалон финансты управлени" - категори "Хъæууон цæрæн бынат".

Конкурсы уыцы номинацийы архайы Октябрыхъæуы бынæттон администраци дæр. Конкурсы республикон хайы бацахста фыццаг бынат.

Ацы фарстайы фæдыл уыд нæ ныхас хъæуы бынæттон администрацийы сæргълæууæг Уалыты Русланимæ.

- Октябрыхъæуы бынæттон хиуынаффæйады администрацийы куыст здæхт у хисæрмагонд хъалонты æмæ æнæхъалон æфтиæгты рæзыны хæстæ æххæст кæнынмæ, уыимæ ма хъæуы æхсæнадон-политикон уавæр бæстон кæнынмæ.

Хъæуы бюджеты æфтиæгты хай 2018 азы æххæстгонд æрцыд 115,6 процентæй. Ивгъуыд азы нæм æрбафтыд 19370,8 мин сомы, уыдонæй хисæрмагонд æфтиæгтæ уыдысты 17829,8 мин сомы, уый та у афæдзы бюджеты снысангонд 117,2 проценты. Фароны æфтиæгтимæ абаргæйæ фæфылдæр сты 9 проценты, кæнæ та 1473,9 мин сомы.

Сæрмагонд бюджеты æфтиæгты бындур сты физикон адæймæгты æфтиæгты хъалон (77%), исады хъалон (15,4%) æмæ а.д.

Ивгъуыд азы фæфылдæр сты физикон адæймæгты исбонон хъалонтæ - 11,3 проценты, уый размæ азимæ абаргæйæ, зæххы хъалон та фæфылдæр 15,7 проценты.

Проект "Формирование комфортной городской среды"-йы фæлгæты Горæтгæрон районы æххæстгонд цыдис муниципалон программæ "Формирование     современной городской среды муниципального образования Пригородный район". Уыцы программæйы фæлгæты Октябрыхъæуы хæрзарæзт æрцыдысты 4 цæрæн корпусты территоритæ, районы доны стацæйы бакодтам цалцæггæнæн куыстытæ, хъæуы астæу - уынгты - бакодтам электрон цырæгътæ.

Нæ хъусдард аздæхтам, адæм фылдæр кæм улæфынц, уыцы фæзуæттæ цъæхвæлыст скæнынмæ. Стыр Уæлахизы бæрæгбонмæ хъæуы сарæзтам номарæн аллейæ, ныссагътам дзы бæлæстæ хæсты ветерантæ æмæ архайджыты кадæн. Ацы акцимæ се 'вæрæн бахастой хæсты архайджытæ, уыдоны хиуæттæ, æхсæнадон кусджытæ, хъæуы иннæ адæм.

Фæскомцæдисы сырæзты 100 азы юбилеймæ та Æрыгон натуралистты станцæйы цур раздæры фæскомцæдисонтимæ ныссагътам 100 бæласы.

Октябрыхъæуы кæрон Хъæд садзыны æппæтуæрæсеон боны хъæуы активисттæ, стæй Æрыгон натуралистты станцæйы ахуыргæнинæгтæ ныссагътой скæсæйнаг тæрсбæлæсты талатæ.

Чысыл æмæ астæуккаг бизнесмæ дæр не 'ргом раздæхтам, уымæн æмæ уыдон сты Октябрыхъæуы социалон-экономикон размæцыды перспективон нысантæ. Чысыл æмæ астæуккаг амалхъомады субъектты нымæц 2018 азы фæфылдæр 42 иуæджы æмæ ныртæккæ сты 356, уыцы нымæцы индивидуалон амалиуæггæнджытæ сты 282, юридиконтæ та - 83.

Чысыл амалиуæгады Октябрыхъæуы адæм фылдæр архайынц базарады фæлхасады. Ис нæм 90 базарадон тæппы, цæрджыты цардуагæн лæггад кæнынц 19 индивидуалон амалиуæггæнæджы, хъæууон хæдзарады та - 24 агропромышленнон комплексы куыстуæттæ. Уыдон фæархайынц алыхуызон конкурсты, æмбырдты.

Амалиуæгады размæцыды æмархайдæн 2018 азы радтам 12 барлæвæрды бахчæйы культурæтæ, ногазон хъазæнтæ æмæ наз бæлæстæ уынгты уæй кæнынæн.

2018 азы Джеоргуыбайы размæ æмæ декабры мæйы кæрон Октябрыхъæуы центры уыд армукъатæ, цæрджытæн фадат уыд алыхуызон хæлцадон товартæ балхæнынæн.

Нæ хъæуы цæрджыты царды уавæртæ фæхуыздæр кæныны тыххæй нæ размæ сæвæрдтам ног хæстæ, æмæ уый тыххæй цæрджыты ‘хсæн цы æрфарст сарæзтам, уыдоны 65% разы сты бынæттон администрацийы куыстæй.

Æз хæрз цыбырæй загътон, саразын нын цы бантыст 2018 азы, уыдоны тыххæй, кусгæ та фылдæр бакодтам. Сыгъдæгдзинад, фæндæгтæ цалцæг кæнын, донуадзæн æмæ канализацион хæтæлтæ ивын, фæкæсынхъуаг адæмæн æххуыс кæнын æмæ ма æндæр фарстатыл дæр архайдтам æрвылбон.

Æппæт уыцы хъуыддæгтæ нын ныфс æмæ фадат дæттынц Æппæтуæрæсеон конкурсы архайынæн. Нæ зæрдæ дарæм уæлахизыл!

ГАССИТЫ Моисей.

Печать