Дæс боны дæргъы комбайнты æмæ уæзласæн автомашинæты уынæр хъуыст Комгæроны хъæуы колхоз "Терек"-ы быдырты. Нартхор цы 413 гектарыл байтыдтой нæмыгæн, уый фæцис æфснайд.

Хæдзарадæн йæхицæн техникæ нæй, фæлæ баххуырста машинæтæ, æмæ куыстытæ цæуынц рæвдз. Хъарм, æнæуаргæ боныхъæд дæр сын сæ къух сарæзта.

Ам нартхор карстой дыууæ комбайны, куыстой сыл Гæззаты Виталик æмæ Авто. Нартхор та сæ КамАЗтыл бынатмæ ластой Тыбылаты Толик, Плиты Михаил, Гæззаты Марат, Плиты Бузи.

Нартхор æфснайыны рæстæг быдырты уыдысты сæрдар Джыккайты Вовæ, арендатортæ Джиголаты Дзæрæхмæт, Гæззаты Тодор, Сланты Олег, Саккаты Витали, Сланты Юрик, Саулохты Уырызмæг, Гаглойты Вовæ, Музиаты Давид.

Колхозы сæрдар Джыккайы-фырт мын афтæ зæгъта: – Раст зæгъгæйæ, нæ тыллæг иннæ азтимæ абаргæйæ афтæ бæркадджын нæу, къаддæр нартхор исæм иу гектарæй. Сæрды дыууæ мæйы бæрц къæвдатæ не 'руарыд, æмæ хур, тæвд бонтæ нартхоры æрзад тынг бахъыгдæрдтой. Фæлæ уæддæр нæ фæнд у, цæмæй дзы куыд æрвылаз, афтæ ныр дæр радтæм хъæубæсты алы хæдзарæн дæр.

ГАССИТЫ Моисей