Боксгæнæн ног зал
Горæтгæрон районы Ирыхъæуы астæуккаг скъола дыууын азы размæ куы байгом, уæд дзы спортивон зал нæ уыд. Фæлæ ралæууыд рæстæг, æмæ йын йæ фарсмæ федералон программæмæ гæсгæ дыууæ азы размæ сарæзтой ног спортивон зал национ проект "Хъæуы комплексон рæзт"-ы фæрцы.
Хъæуы фæсивæд баныхас, бафæнд кодтой, æмæ æрцыдысты иу хъуыдымæ: спортивон комплексы дыккаг уæладзыджы боксы зал байгом кæнын. Æмæ сын æнтысгæ дæр бакодта. Фæсивæд сæ кæрæдзийы æхсæн æрæмбырд кодтой æхцайы фæрæзтæ, æмæ сæ арфæйаджы хъуыддаг сырæзт æрдæг азмæ. Сцæттæ боксгæнæн зал, ис дзы алы хъæугæ ифтонггæрзтæ, рæсугъд рафидыдта. Кусгæ æмæ йæ аразгæ дæр скодтой хъæуы фæсивæд – 45 адæймагæй фылдæр. Байгом цытджын æгъдауæй.
Ардæм æрбацыдысты районы æмæ бынæттон администрациты бæрнон кусджытæ, спортсментæ, ахуыргæнджытæ æмæ скъоладзаутæ, хъæубæсты адæм, фылдæр – фæсивæд.
Бæрæгбонон мадзал байгом кодта хъæуы Ныхасы сæрдар Хъæцмæзты Юри æмæ арфæ ракодта, ацы хорз хъуыддаг чи æрымысыд æмæ залы арæзтадыл чи бакуыста, уыдонæн. Уый фæстæ раныхас кодтой Ирыхъæуы бынæттон администрацийы сæргълæууæг Сиукъаты Иринæ, хъæуы астæуккаг скъолайы директор Кънатты Азæ, Ногиры цæрæг, Уæрæсе æмæ Европæйы боксæй чемпион Хуыгаты Алан, районы администрацийы сæргълæууæджы хæдивæг Хъодзаты Таймураз, Горæтгæрон районы спорты æмæ физикон культурæйы фæдыл хайады хицау Дзеранты Марик, районы администрацийы сæргълæууæджы унаффæгæнæг Къуымæриттаты Хетæг, æрмхæстæй дунейы чемпион Дыгъуызты Малхаз æмæ æндæртæ. Спортивон зал аразджытæ бузныг загътой скъолайы директорæн, цæстуарзонæй сæм йæ хъус кæй дардта, уый тыххæй.
Ныр дыууæ къуырийы бæрц кусы ацы спортивон зал. Боксы секцитæн тренертæ сты Нартыхты Хъазбег æмæ Болататы Афтандил.
Мадзалы ирон æгъдаумæ гæсгæ нæ фæсивæды, уыдонимæ сæрмагонд æфсæддон операцийы архайджыты, Стыр Хуыцау, зæдтæ, æмæ дауджытыл æртæ чъири, бæгæныйы кæхц æмæ кусæрттаджы æртæ фæрскæй бафæдзæхста Хъæцмæзты Юри.
Ацы спортивон залмæ ныридæгæн тренировкæтæм цæуынц кæстæртæ канд Ирыхъæуæй нæ, фæлæ ма Камбилеевкæ, Октябрыхъæу, Сунжæ æмæ æндæр хъæутæй дæр. Сæ нымæц бонæй-бонмæ фылдæр кæны.
Олимпиаг хъæзтыты чемпионтæ суæнт!
ГАССИТЫ Моисей