Æмткæй Ирыстоны æмæ уый æддейæ дæр зындгонд у Хуссар Ирыстоны раздæры культурæйы министр, аивæдты сгуыхт архайæг, хъуыстгонд режиссер Дзуццаты Тамерлан. Уый æрæджы Республикæ Абхазы паддзахадон драмон театры сценæйыл сæвæрдта уырыссаг-советон драматург Шварцы комедион спектакль "Голый король", æмæ дзы уымæй байгом юбилейон 95-æм театралон сезон.

Евгени Шварцы комедион-философон пьесæмæ гæсгæ æвæрд спектакль æрæмбырд кодта тынг бирæ адæм, стыр æхсызгонæй йæм бакастысты. Архайдтой дзы 25 курдиатджын актеры.

Ацы комеди сæвæрынмæ Тамерлан æрæвнæлдта ацы сæрды райдианы. Спектаклæн сценикон уæлæдарæс сцæттæ кæныныл та бакуыста Хуссар Ирыстоны сгуыхт нывгæнæг Бекъойты Хох.

Абхазы драмон театры артист Кесоу Хагба куыд зæгъы, афтæмæй ацы премьерæ ацыд тынг хорз, театрдзаутæ йæм бакастысты зæрдиагæй.

Пьесæ у тынг актуалон алы рæстæгæн дæр, æмæ йын уымæ гæсгæ стыр аргъ скодтой нæ аивадуарзджытæ. Ацы премьерæ Абхазы культурон царды æмæ театры дæр уыд егъау цау. Артисттæ ахъазыдысты æнцон æмæ æхсызгонæй.

ГАССИТЫ Моисей