90 азы сæххæст зындгонд филолог æмæ ахуыргонд, бирæ хæрзиуджыты хицау, профессор Плиты Гаврилы фырт Гацырыл. Уый æхсай азæй фылдæр кæсы лекцитæ студенттæн æмæ сыл тауы фарн. Рукъаг хорз лæгæн Хуссар Ирыстоны йæ юбилей банысан кодтой кадджын æгъдауæй, уæрæхæй. Мадзал уагъд цыд, кæм кусы, уым – Хуссар Ирыстоны Тыбылты Алыксандры номыл паддзахадон университеты. Ам æрæмбырд тынг бирæ адæм – ахуыргæндтæ, фысджытæ, артисттæ, зонадон кусджытæ, ахуыргæнинæгтæ, студенттæ, лектортæ, юбиляры хиуæттæ, мыггаг, делегаци Цæгат Ирыстонæй. Ахуыргæнæндоны æмбырдтæ аразæн залы юбилейон изæр амыдта университеты ирон литературæйы кафедрæйы хистæр ахуыргæнæг Плиты Серго.

Раздæр уал адæм бакастысты, университеты телеуынынад Гацырыл цы документалон киноныв систа, уымæ. Уый фæстæ Плийы-фыртæн арфæйы ныхæстæ ракодтой университеты ректор, профессор Тедеты Вадим, Хуссар Ирыстоны Президенты паддзахадон уынаффæгæнæг Беджызаты Батрадз, республикæйы фыццаг президент, профессор Цыбырты Людвиг, Цæгат Ирыстоны журнал "Мах дуг"-ы сæйраг редактор Хетæгкаты Оксанæ, Аланты Ныхасы сæрдар Тыбылты Леонид, рукъгоймаг инженер Къозонты Мельс, Плийы-фырты æмкусон Цхуырбаты Любæ, профессор Хуыгаты Илья, Горæтгæрон районы газет "Фидиуæг"-ы кусæг, Гацыры студент Гасситы Моисей, профессор Дзиццойты Юри, Плиты Серго, мыггаджы номæй Плиты Хаджумар æмæ рукъаг Плиты Пушкин.

Уый фæстæ райдыдта юбилейон зонадон конференци. Докладтæ бакастысты университеты ирон æвзаг æмæ литературæйы ахуыргæнæг Кокойты Тарзан ("Плиты Гацыры цард æмæ архайд"), ирон литературæйы кафедрæйы доцент, филологон зонæдты кандидат Биазырты Аллæ ("Плиты Гацыры сфæлдыстадон хуынтæ"), ирон литературæйы кафедрæйы профессор Хъазиты Мелитон ("Плиты Гацыры ныхас нæ литературæ æмæ йæ зиууæттыл"), ирон филологи æмæ райдайæн методикæйы факультеты декан, доцент Тыбылты Ингæ ("Плиты Гацыры хъуыдытæ ирон æвзаджы абон æмæ сомбоныл"), университеты Ирыстоны истори æмæ кавказзонынады кафедрæйы разамонæг Хъуылымбегты Роберт ("Плиты Гацыр – этнограф"), Плиты Серго ("Плиты мыггаджы литературон зиууæттæм Плиты Гацыры ахаст").

Гацыр ацы аз æхсæз мæймæ мыхуыры рауагъта æртæ чиныджы: "Мæ фæззыгон най", "Ныхас – царды суадон" æмæ "Бæсты сæрвæлтау". Уыдонæн дæр уыд презентаци, æмæ сын адæм скодтой хорз аргъ.

Арфæйаг у, Гацыр!

ГАССИТЫ Моисей