Дыккæгæм июлы, куыддæр скъолаты цур сæрдыгон лагерьты улæфты рæстæг ахицæн, афтæ Комгæроны хъæуы иумæйагахуырадон астæуккаг скъола дæр æрæвнæлдта ног ахуыры азмæ цалцæггæнæн куыстытæм.

Ам ахорынц кълæстæ, кабинеттæ, хæрæндон, тыргътæ, асинтæ, иннæ хатæнтæ, фасад. Ныридæгæн дзы ахуыргæнджытæ, техперсонал дзæвгар куыстытæ сæххæст кодтой.

Директор Тотраты Анжелæ куыд зæгъы, афтæмæй ахуыргæнæндоны агъуыст кæмдæрты тæдзы æмæ уымæлад бынмæ хъары. Уымæ гæсгæ, мидæгæй дон кæм тæдзы, уыцы бæнæттæ косметикон цалцæг нæма скодтой. "Русгидро"-йы Цæгат Ирыстоны хайады сын ныфс бавæрдтой, агъуысты зыхъхъыртæ, гом рæттæ кæм ис, уыдон сцалцæг кæнынæй, æмæ куыддæр уый бакæной, афтæ мидæгæй кæронмæ ахицæн уыдзысты иннæ куыстытæ дæр.

Скъоладзауты ныййарджытæ дæр æххæст кæнынц цалцæггæнæн куыстытæ. Уыдон сты: Гаджиты Заремæ, Уалыты Фатимæ, Букуылты Мæдинæ, Хацырты Людмилæ, Персаты Шоренæ, Кокойты Маринæ, Джыгкайты Миленæ, Тыбылаты Беллæ, Хуыгаты Алинæ, Тыбылаты Мальвинæ æмæ æндæртæ.

Ныридæгæн бæрæг у, ацы скъоламæ фыццаг къласмæ ахуыр кæнынмæ кæй æрбацæудзæн 12 скъоладзауы. Æмткæй ахуыргæнинæгты нымæц та уыдзæн 120. Фаг дзы ис ахуыргæнджытæ.

Ног ахуыры азмæ алы скъоладзауæн дæр радтой ахуыргæнæн чингуытæ.

Уæдæ Комгæроны хъæуы астæуккаг скъола дæр ног ахуыры азыл æдзæттæйæ нæ сæмбæлдзæн.

ГАССИТЫ Моисей