Уæрæсейы Национ гвардийы æфсæдты федералон службæйы директор, Национ гвардийы æфсæдты сæйраг къамандыгæнæг, Уæрæсейы Хъæбатыр, æфсады инæлар Виктор Золотов фатеры дæгъæлтæ радта Горæтгæрон районы дæллагсанибайаг Уæрæсейы Хъæбатыр Тыбылаты Мараты идæдз Хозиты Мæдинæйæн.

Фембæлды архайдтой ведомствæйы разамынд, центрон аппараты хицæуттæ. Виктор Золотов куыд радзырдта, афтæмæй æрæмбырд сты Тыбылаты Мараты ногæй æрымысыны, йæ бинойнаг Хозиты Мæдинæйæн кад скæныны тыххæй. Уæрæсейы Национ гвардийы разамонæг куыд загъта, афтæмæй Тыбылаты лæппу уыд Фыдыбæстæйы æцæг хъахъхъæнæг, йæ равзæрст дæсныйады арæхстджын, бирæ хъуыддæгтæ йын дзæбæх æнтыстысты.

– Мæдинæ, мах дæ сæрыхицауимæ сæрмагонд æфсæддон операцийы цалдæр хатты сæмбæлдыстæм. Уæд æз бамбæрстон: уый уыдис зондджын афицер, иттæг хорз командир, Фыдыбæстæ æцæг хъахъхъæнæг. Дæхæдæг бахаудтæ Беслæны фыдбæллæхы, амынæты фæдæ æмæ зоныс, терроризм куыд тæссаг, куыд æвирхъау у, уый. Дæ сæрыхицау Курскы областмæ бабырсæг боевиктæ æмæ националисттимæ тохы фæмард. Майор Тыбылаты Марат йæ службæйыл уыд æнувыд, хъæбатырдзинады, патриотизмы æцæг дæнцæгæй баззад нæ зæрдæты. Махæй рох нæ уыдзæн, – загъта хæстон инæлар.

Скъоладзау ма уыд Хозиты Мæдинæ, афтæмæй бахауд Беслæны фыдбæллæхы. Ныртæккæ Уæрæсейы Хъæбатыры идæдз Национ гвардийы æфсады йæ службæ дарддæр хæссы.

– Бузныг уæ лæвары тыххæй – ног фатеры дæгъæлтæ мын радтат. Мæ сæрыхицау Тыбылаты Марат фæмард нæ бæстæйы сæраппонд. Сымах цы æмбарындзинад равдыстат, уый мæнæн у зæрдылдарæн æмæ узæлд æвдисыны нысан. Мараты хъæбатырдзинады бындурыл арæзт у мæ фидæны фæндаг. Мæ службæ Национ гвардийы æфсады дарддæр хæсдзынæн, Мараты та мысдзынæн мæ ног фатеры. Виктор Василийы фырт, бузныг уын, нæ бæстæйы сæраппонд йæ цард чи радта, уыцы хæстонты бинонты рох кæнын кæй нæ уадзут, уый тыххæй, – загъта Мæдинæ.

Фатер ис Дзуæджыхъæуы центры, æлхæд æрцыд æнæкоммерцион автономон организаци "Победоносец"-ы фæрцы.

Тыбылаты Марат йæ службæйы хæстон хæстæ сæрмагонд æфсæддон операцийы фыццаг бонæй фæстæмæ æххæст кодта. Хъæбатырдзинад æмæ æвзыгъддзинады тыххæй хорзæхгонд æрцыд Лæгдзинады дыууæ орденæй. Курскы областмæ 2025 азы æрбабырсæг боевиктæ æмæ националисттимæ тохы цы æхсар æмæ сахъдзинад равдыста, уый тыххæй та йын лæвæрд æрцыд Уæрæсейы Хъæбатыры ном.

23 февралы, Фыдыбæстæ хъахъхъæнæджы бон, Уæрæсейы Президент Владимир Путин Кремлы Георгийы залы Уæресейы гвардийы афицер Тыбылаты Маратæн радта Сыгъзæрин Стъалыйы майдан. Уырдæм Марат схæццæ тохы быдырæй æмæ фæстæмæ ацыд йæ хæстон æмбæлттæм. Уымæй мæй куы рацыд, уæд, 2025 азы 28 мартъийы, Уæрæсейы Хъæбатыр Тыбылаты Марат фæмард Курскы областы, йæ службæйы хæстæ æххæстгæнгæйæ.

ГАССИТЫ Моисей