Нæ республикæйы цы æхсæнадон змæлдтытæ ис, уыдонæй иу у "Иудзинад". Уый цалдæр азы фæд-фæдыл саразы республикон æркаст-конкурс "Ирон дæн æз". Йæ нысан у рæзгæ фæлтæрыл æфтауын æнувыддзинад Фыдыбæстæйыл, мадæлон æвзаг æмæ æндæр рæсугъд æгъдæуттæ ма рох кæнын.

Æркаст-конкурс конд æрцыд Дзæуджыхъæуы Фæсивæды галуаны, æмæ дзы архайдтой аст чызджы, уыдонимæ – Джызæлы хъæуы фыццæгæм астæуккаг скъолайы ахуырдзау Гæджынаты Дианæ дæр. Уыдонæн аргъ кодта сæрмагонд жюри фондз адæймаджы скондæй Мамытты Тамерланы сæргълæудæй.

Æркасты архайджытæ æмæ ардæм æрбацæуæг адæмæн арфæйы ныхæстæ загътой Цæгат Ирыстоны национ политикæ æмæ æддагон бастдзинæдты министры хæдивæг Къуымæллæгаты Олег æмæ Мамытты Тамерлан.

Æркасты архайæг чызджытæ дзырдтой сæ мыггаджы равзæрды тыххæй, ирон фыдæлтыккон бæрæгбæттыл, хæринæгтыл, чындзæхсæвы æгъдæуттыл, сæ арæхстдзинад равдыстой кафынæй, æмдзæвгæтæ кæсынæй.

Конкурс-æркаст "Ирон дæн æз"-ы кæронбæттæны сбæрæг сты уæлахиздзаутæ. Жюрийы уæнгтæ дыккаг бынат саккаг кодтой джызæйлаг Гæджынаты Дианæйæн (ахуыргæнæг Басилаты Людмилæ). Дианæйæн дæр радтой æхцайы преми æмæ лæвар. Уый фæстæ уыд концерт.

Арфæ кæнæм Дианæйæн ахæм уæлахизы тыххæй!

ГАССИТЫ Моисей