Комгæроны хъæуы райдзаст, ногцалцæгконд культурæйы Хæдзары ацыд хъæубæсты сход. Бæрæг уыд, хъæубæсты адæм дыууæ дихы кæй фесты, æмæ сæ алчи дæр йæхи раст æнхъæлы.

Хъæуы цæрæг Болататы Тенгиз катайгæнгæ дзырдта, хъæубæстæ къордтæ, дихтæ куы кæной, уæд уый хорзæй кæй ницы æрхæсдзæн, «кæрæдзийы æмбарындзинад нæм хъуамæ уа».
Ацы фарстайыл уыд фылдæр йæ раныхас нæ районы администрацийы сæргълæууæджы хæдивæг, финансты управленийы хицау Гæбæраты Артурæн, æмæ æрсидтис, цæмæй хъæубæстæ хистæрæй кæстæрмæ сæ кæрæдзимæ æнгомдæр æрбалæууой æмæ иумæйаг хъуыддæгтæ аразой. Уый уыдзæн се ‘нтысты рахæцæны бындур.
Хъæуы бынæттон администрацийы сæргълæууæг Туаты Олег бирæ рæстæг нæма кусы. Ивгъуыд азы администраци куыд æмæ цы бакуыста, уый тыххæй сходы адæмæн скодта хыгъдон доклад.
Туайы-фырт æмæ раныхасгæнджытæ - Тотраты Вадим, Сагкаты Иракле, Болататы Æхсар, хъæуы «Ныхас»-ы сæрдар Теблойты Гриша, районы «Ныхас»-ы сæрдар Ходы Æхсар æмæ æндæртæ бирæ ахсджиаг фарстатыл æрдзырдтой. Фæсивæды хъомыладмæ аздахын хъæуы фылдæр æргом. Депутаттæ дæр хъуамæ активондæр уой. Ирон æгъдæуттæм фылдæр æргом аздахын хъæуы.
Туаты Олег куыд загъта, афтæмæй хъæуы зæххытæ сты 593 гектары, ис дзы 320 хæдзары.
2017 азы Комгæроны райгуырд 21 адæймагы, цардæй ахицæн сты 17-æй. Администраци æхцайы фæрæзтæй баххуыс кодта тыхст рынчынтæн, зын уавæрты чи цæры, уыдонæн. Архайдта хъæуы санитарон уавæр æрбæстон кæныныл, сарæзта цалдæр сыгъдæгдзинады бонтæ. Сцалцæг кодтой Уæллаг æмæ Дæллаг Комгæроны хъæуты фæндæгтæ, Ворошиловы уынджы иу хай та асфальтæй бамбæрзтой, иннæ æрдæг дæр ацы аз кæронмæ фæуыдзысты. Районы администрацийы æххуыссæй ма асфальт кæндзысты æндæр уынгтæ дæр.
Адæмæн бæлццæттæласæн автобусмæ æнхъæлмæ кæсæн бынæттæ ацы аз сараздзысты æртæ: дыууæ Дæллаг, иу та – Уæллаг Комгæроны.
Ивгъуыд азы уынгты сæвæрдтой 40 электрорухсгæнæны, ацы аз сæ фæфылдæр кæндзысты, æнæмбæлгæ быронкалæнтæй асыгъдæг кæндзысты фæзуат.
Æмбырды тынг бирæ дзырд цыд нуазыны дон кæй нæ фаг кæны иуæй-иу уынгты цæрджытæн, фылдæр – сæрдыгон рæстæг, æмæ дыууæ уынгыл сараздзысты цъайтæ.
Администраци ма фæнд кæны фæсивæды ‘хсæн спортивон ерыстæ аразын æмæ хъуамæ суой традицион. Ис ма сæм æндæр фæндтæ дæр.
Сходы ма дзырд цыд экстремизм æмæ терроризм ма руадзыныл, алы адæмыхатты минæвæрттимæ хæларæй цæрыныл, карз нозт ма кæныныл.        
Администрацийы сæргълæууæг радзырдта бынæттон бюджеты тыххæй, адæмы базонгæ кодта, алыхуызон хъалонтæ куыд æмбырд кодтой, уыимæ. Ивгъуыд азы хъалонтæн æрæмбырд кодтой мбисæй къаддæр (45%).
Æмбырды архайджытæ Комгæроны хъæуы «Ныхас»-ы сæрдарæй сæвзæрстой Болататы Тенгизы.
Хыгъдон рæстæг хъæуы администрацийы куыст нымад æрцыд растæмбисыл.
Гасситы Моисей.
Авторы ист къам.