Ивгъуыд сабаты цытджын æгъдауæй Уæрæсейы æфсады рæнхъытæм афæндараст кодтой нæ районæй 9 сидтоны.

Уыдонæн арфæтæ ракæнынмæ æмæ сæ Уастырджийыл бафæдзæхсынмæ æфсæддон къамисарады кæртмæ æрбацыдысты Горæтгæрон районы администрацийы сæргълæууæг Есиаты Руслан, "Ныхас"-ы сæрдар Дзуццаты Валери, Культурæйы галуаны директор Мæхъиты Хадизæт, сидтонты ныййарджытæ, хиуæттæ, æмбæлттæ.

Куыд æрвылхатт, афтæ та ныр дæр æппæт архайджыты зæрдæтæ барухс кодтой Культурæйы галуаны зарæггæнджытæ, фæндырдзæгъдджытæ. Уыдон сæххæст кодтой алыхуызон номыртæ.

Ацы мадзалы ма районы æфсæддон комиссар Виктор Пелехов Арфæйы гæххæттытæй схорзæхджын кодта, Ирыстоны фæсивæдæй Уæрæсейы æфсады рæнхъыты службæ кæнгæйæ йæхи сæрæнæй чи равдыста, уыдоны ныййарджытæ, бабатæ æмæ нанаты (сæ иутæ дзы сидзæртæ сты).

Уыцы лæппутæ сты: Октябрыхъæуæй - Пæрæстаты Артур æмæ Хъуылымбегты Вадим, Æрхонкæйæ – Валери Арисланов, Камбилеевкæйæ - Гуырцъыты Марат. Уыдон се 'фсæддон хæс фидынц нæ бæстæйы алы къуымты: Артур - Бетъырбухы, Вадим - Хабаровскы, Валери - Крымскы, Марат та - Невинномысскы. Ацы лæппутæн се 'фсæддон цæттæдзинад æмæ иттæг хорз службæйы тыххæй Кады грамотæтæ æрæрвыстой Горæтгæрон районы æфсæддон комиссарадмæ, кæм службæ кæнынц, уыцы хæйтты командæгæнджытæ.

Уыдонæн дæр æмæ ног сидтонтæн дæр зæгъæм: "Рæствæндаг ут æмæ фæрнæй службæ кæнут ирд арвы бын!"

 

ГАССИТЫ Моисей.

Печать