Цæгат Кавказы рагондæр литературон-аивадон æмæ æхсæнадон-политикон журналтæй иу - "Мах дуг", йæ фидæныл фидарæй æууæндгæйæ, цæуы йæ 90 азы юбилей сбæрæг кæныны фæндагыл.

Уыимæ сæйраг редактор Хетæгкаты Оксанæйы разамындæй кусæг коллектив, сфæлдыстадон фæлтæртæ кæрæдзийыл бæттыны зондылхæст уæвгæйæ, ног курдиатджын автортæ дæр агуры.

Уыцы хъуыддагмæ ахадгæ бавæрæн сси журнал "Мах дуг"-ы дунеон преми. Лæвæрд цыд фыццаг хатт, æмæ бæрæг нæ уыд, иронау чи фыссы, уыцы автортæ йæм цы æргом аздахдзысты, уый. Фæлæ ныр бæлвырд у - хорз хъæппæрис æмхъуыдыгæнджытæ ссардта - 100 авторæй фылдæр балæвæрдтой 200 куыстæй фылдæр. Се 'хсæн - зындгонд фысджытæ, студенттæ, скъоладзаутæ.

"Ис ирон æвзагæн фидæн!" - ацы хъуыды иу æмæ дыууæ хатты нæ азæлыд, лауреаттæн хæрзиуджытæ дæтгæйæ арфæтæ чи кодта, уыдоны раныхасты. Кадджын уазджытæ та бирæ æрбацыд, уыдонимæ - нæ республикæйы Хицауады сæрдары хæдивджытæ Бокоты Эльбрус æмæ Тугъанаты Ларисæ, Хуссар Ирыстоны делегаци, районты администрациты минæвæрттæ, интеллигенци. Бирæтæ дзы стыр бузныджы ныхæстæ загътой амалхъом Джусойты Альбертæн. Уый балæууыд фыццаджыдæр редакцийы коллективы фарсмæ, æмæ йын кæд Мæскуыйæ æрцæуыны фадат нæ фæци, уæддæр йæ арфæйы фыстæджы фæнысан кодта мадæлон æвзаджы удварны хæзнатæ парахат кæныны хъуыддаджы ахсджиагдзинад.

Разынд ма ноджы Иры аккаг хъæбултæй преми расидынæн æххуысгæнджытæ, æмæ арфæйаг уæнт се 'ппæт дæр…

Фыццаг премийы лауреаттæ та сæхи кары къордты систы Ирыстоны адæмон фыссæг Хуыгаты Сергей, Годжыцаты Нæирæ (прозæйы номинаци), Колыты Витали, Бететы Фатимæ (поэзи), Мамиаты Таймураз, Уыртаты Сæрмæт (публицистикæ), Рæмонты Ритæ (драматурги), Безаты Фаризæ, Гегкиты Сослан (аивадон тæлмац).

Сывæллæтты сфæлдыстады номинациты хуыздæртыл нымад æрцыдысты Гуыцмæзты Марат (поэзи, Беслæны 7-æм скъолайы 5-æм къласы ахуыргæнинаг, йæ ахуыргæнæг - Гæбæраты Риммæ), Касаты Алинæ (прозæ, гимназ "Диалог", йæ ахуыргæнæг - Касаты Индирæ), Къуыллыты Чермен (аивадон тæлмац, Беслæны 7-æм скъолайы 7-æм къласы ахуыргæнинаг, йæ ахуыргæнæг - Къуыллыты Джульеттæ). Уыдонæн, стæй дыккаг æмæ æртыккаг премиты лауреаттæн сæ хæрзиуджытæ радтой æмæ сфæлдыстады бæрзæндтæм хизыны фæндиæгтæ загътой Хицауады, районты администрациты, æхсæнадон организациты æмæ ахуыргæнæндæтты минæвæрттæ.

Уæлдай æхсызгондæр у, лауреатты 'хсæн Горæтгæрон районы минæвæрттæ дзæвгар кæй ис, уый. Арфæ сын ракодта, сæ лæвæрттæ сын кадджын изæры радта районы бынæттон хиуынаффæйады администрацийы сæргълæууæг Есиаты Руслан. Номинаци "Публицистикæ"-йы, уæлдæр куыд амынд æрцыд, афтæмæй уæлахиздзау сси дæргъæвсаг Уыртаты Сæрмæт, сывæллæтты сфæлдыстады номинаци "Аивадон тæлмац"-ы 2-аг бынат бацахста Æрхонкæйы 1-æм скъолайы ахуыргæнинаг  Икъаты Элинæ (10-æм кълас, йæ ахуыргæнæг - Тадтаты Заремæ). Æртыккаг къæпхæны дипломтæ райстой уыцы скъолайы иннæ ахуыргæнинæгтæ Болататы Камилæ (8-æм кълас, йæ ахуыргæнæг - Гæззаты Татьянæ) æмæ Хетæгкаты Алинæ (11-æм кълас, йæ ахуыргæнæг - Хетæгкаты Лия).

Къамты: ЕСИАТЫ Руслан æмæ Уыртаты Сæрмæт.

ТАДТАТЫ Заремæ, БОЛАТАТЫ Камилæ æмæ Хетæгкаты Алинæ.

 

ТЪЕХТЫ Тамерлан.

Æлборты Дианæйы

ист къамтæ.

Печать E-mail