Адæмы хæрзиуæгæн
Уæрæсейы Президент Владимир Путинмæ фæстаг "Комкоммæ линийы" цы фарстатæ радтой, уыдонæй иу уыд, цæмæй, æрдзон газ кæмæ нæй, уыдонмæ йæ бауадзой лæвар. Президент ацы фарстамæ уæлдай æргом аздæхта æмæ бахæс кодта профилон министрадтæ æмæ ведомствæтæн, цæмæй æвæстиатæй æркæсой хъуыддагмæ. Уый тыххæй Уæрæсейы райдыдтой кусын.
Цæгат Ирыстоны цæрæнуатон-коммуналон хæдзарады, артаг æмæ энергетикæйы министрад æнæххæст бæрнондзинады æхсæнад "Газпром Межрегионгаз Владикавказ"-имæ иумæ сарæзтой мобилон пункттæ Æрæфы районы Мацутæйы хъæуы æмæ Горæтгæрон районы дыргъдарынады æнæкоммерцион æмбалад (СНО) "Хурзæрин"-ы.
Æртыццæджы, 7 июлы "Хурзæрин"-ы административон бæстыхаймæ бирæ адæм цыд нæ районы хъæутæй. Уыдонæн сæ цардуагон уавæрты тыхстдæр фарстатæй иу у, æрдзон газ сæм кæй нæй, уый. Уыцы адæмæн сæ фылдæр хай сты Гуырдзыстон æмæ Хуссар Ирыстонæй лигъдæттæ. Ам ног бынæтты æрцардысты, æмæ сæм газы фарста абоны онг кæронмæ, кæнæ та æппындæр лыггонд нæма 'рцыд.
Цæрджытæ æрбацыдысты æд курдиæттæ æмæ хъæугæ документтимæ, æмæ сын бæстон дзуæппытæ лæвæрдтой клиентон центры кусджытæ Абойты Анжелæ, Битарты Ланæ æмæ æндæр специалисттæ. Загътой, æппæт нормативон акттæм дæр кæй æркæсдзысты ацы азы 1 ноябрьмæ, æмæ уæд сбæрæг кæндзысты, сæ хæдзаргæрон зæххыты онг кæмæ æмбæлы æрдзон газ бауадзын, уыдон номхыгъд.