Ссардтой сын сæ рухс нæмттæ
23 февралы, Фыдыбæстæ хъахъхъæнæджы боны номарæн мадзæлттæ сарæзтой нæ районы хъæуты дæр.
Иу ахæм мадзал уыд Комгæроны. Дыууæ азы размæ колхозы хардзæй хъæуы арæзт æрцыд цыртдзæвæн, фыст ыл сты 105 хæстоны мыггæгтæ æмæ нæмттæ. Уыдон хъæбатырæй тох кодтой Фыццаг дунеон, Фыдыбæстæйы Стыр хæсты, Афганистаны æмæ 1992 азы быцæуты. Сæ сæртæ нывондæн æрхастой Фыдыбæстæйы сæрвæлтау.
Фыдыбæстæ хъахъхъæнæджы боны кадæн ацы цыртдзæвæны цурмæ æрбамбырд сты хъæубæсты алы кары адæм, скъоладзаутæ сæ ахуыргæнджытимæ æмæ хæстонтæн ссардтой сæ рухс нæмттæ, цыртдзæвæныл сæвæрдтой дидинджытæ.
Советон Цæдис, Уæрæсейы æфсады истори æмæ хъæбатырдзинады тыххæй радзырдтой Комгæроны хъæуы ветеранты Советы сæрдар Теблойты Гришæ, колхозы сæрдар Джыккайты Вовæ, астæуккаг скъолайы директор Тотраты Анжелæ, "Ныхас"-ы сæрдар Болататы Тенгиз æмæ æндæртæ. Скъоладзаутæ бакастысты хæстон æмæ сабырдзинады темæйыл æмдзæвгæтæ, акодтой тематикон зарджытæ.
Кад - Фыдыбæстæ хъахъхъæнæгæн!